بسم الله الرحمن الرحيم
ذكر المواجع للشاعر المبدع المتألق
عوض القطياني
على ذكر المواجع والسفر والــحـِل والترحال
***** طويت آخر ورق عندي بقى من دفتر أحزاني
طويته وأنكسر قلبي وصوتي بالمواجع سال
***** ودريت إن الظلام اللي تحت كف السهر جاني
جلست أجمع مسافاتي وأغني للسفر موال
***** على صفحة من الماضي بها حلمي وعنواني
بها كم سافرت عيني ليالي والظلام أهوال
***** ولها كم سافرت روحي و أنا بالليل وحداني
حبيبي ليلة البارح مشيت من الغرام أميال
***** وراك وفلت الذكرى شعرهـــــا لين غطاني
جلست أمشط ظفايرها على كتف الظلام وطال
***** تخيـّل من شعرها كل خصلة لي وطن ثاني
حبيبي كل ما أشوفك تجي بالذاكرة تختال
***** نهر من كوثر الذكرى يجي من فايض أشجاني
تخيـل يوم عانقني خيالك خاطري وش قال
***** تخيـل قبل أسولف لك نشدني عنك وجداني
نشدني لين خلاني مديـنـة هـزّهـا زلـــزال
***** تخيـل مـــاهـدى حـتـى لقاك بوسط شرياني
أروح لسدرة الموعد معاي لجيدها سلسال
***** وأخاف انك تجي قبلي وترحـــــل قبل تلقاني
هنا كانت ليالينا.....غلا والمقبلات آمال
***** وهنا كانت مواعيدك .. مطر تخضربه أغصاني
هنا..كانت نواظرنا سوالف في كلام أطفال
***** وهـنـا كـانـت عـصافيرك على دربي تحراني
وهنا..شف باقي أثارك على رمل الوعد مازال
***** وهنا..شف دمعة ٍ طاحت من عيونك علشاني
حبيبي...لاتنشـّدني عن أوضاعي وكيف الحال
***** أنـا بـعـدك سحاب أبيض أضم الريح بأحضاني
غلاك بدلـّة الذكرى بهار وهاجسي فنجال
***** تـقـهــواه الجــروح اللي بــهـا ذكــراك تنعاني
تسافربي وأحسب اني وصلت آخر وطن بالبال
***** وأثـرنـي مــاوصـلـت ألاّ بـدايـة درب حـرمـاني
وتبقى سيرة الذكرى قصيدة تكتب الترحال
***** ســوالف لـلــعيون اللي صداها دمعة لساني
الثلاثاء أكتوبر 16, 2007 7:17 pm
